بالعامية بحبك قصة السعادة والحب
الكل صار بيعرف فيها .. الكل عم يحكي علينا ..
صار لازم نطوّر هالعلاقة
لازم تصير علاقة رسمية
علاقة خطبة أو زواج
الحب وحدو ما عاد بكفي ..
و شو المشكلة
شو الحاجز يلي بيمنعك تعمل هيك .. ؟
الفقر .. اي الفقر ..
بعرف انو اهلك عم يضغطو عليكي
و انو في احسن مني عم يتقدمولك
بعرف أنهم ما بيقبلو فيتي هيك
وانا ما عندي لا بيت ولا مصاري
و بعرف كمان انك بتحبني
و انو ما حدا بقدّر هالحب
وضع البلد الحرب وكل شي
عم يوقف بوشي ..
حتى حق الخاتم الصغير
يلي حلمنا فيه ما معي
_ شو فيني اعمل و ما عملتو ..
* عميل اي شي انت الرجال مو انا ..
" آخر جملة قالتلو ياها ومشيت بعيون دمعة جواتهم مخباية "
مر اسبوع
ما اتصل ..ما اتطمن عنها ..
ما بعمرو عمل هيك
كان اسبوع كلو وجع ودموع
اسبوع النوم فيه ممنوع
وبعد هالأسبوع اتصل ..!!
طلب يشوفها بنفس المكان
يلي عرفها فيه ..
كان بصوتو في شي مو مفهوم
في تعب و وجع و دمع و شوق
و شوية امل مخبى ...
هالمرة ما حكالها عن احلامو بعرسهم
و عن وعودو يلي ما بتخلص ..
متل كل مرة ..
و بآخر المكالمة قال :
لأني بحبك ما عاد فيني عذبك اكتر
و حملك هم و وجع مالك قدهم ..
تأكدي اني بضحي بكل شي
بحياتي إلا حبّك ..
بشوفك على الموعد لا تتأخري ..
ما قلها تصبحي على خير
وانتبهي على حالك ..
ما قلها نامي وحلمي انو بكرا احلى
ما حكالها شي قصة عن الأمل ...
و شو ممكن تفهم من هالحكي ..
و شو يلي ممكن يكون مخبى ..
معقول الفراق ؟؟
كانت طول اليل سهرانة عم تفكر
شو ممكن يكون .. !!
صار الوقت
لبست نفس اللبس يلي عرفها فيهم
ما حطت كحلة .. كانت واثقة انها رح تنخرب
طلعت من البيت كان قلبها
عم يدق بسرعة و ايديها عم ترجف " متوترة "
وصلت على المكان ..
و بنفس المكان ..
شافت شي ما توقعتو ابداً
مو مصدقة هي بشي
حلم من يلي بيحكيلها ياهم
و لا بالحقيقة .. ركدت متل المجنونة
صارت قبالو ..
كان لابس طقم جديد
بأيدو وردة حمرا ..
شعراتو مزبطين ..
بسمة على وجهو ..
كان جامع رفقاتها و رفقاتو يلي بيعرفوهم
وكل يلي كانو يحكو عليهم ...!!
وبدون ولا كلمة
وبدون اي تردد
وبدون ما تفهم شي
غمرتو .. غمرة اختفى فيها
وجع دني .. بدقيقة
متل السحر ..
كانت غمرة عمر .. غمرة جبل من امل
عطاها الوردة ..
هي الوردة قطفتلك ياها من احسن جنينة :P
و الخاتم يلي حلمنا فيه صار جاهز
البيت صح مو متل ما حلمنا بس
رح يكون احلى بيت بالعالم
ورح نبني سوا فيه احلامنا ..
و اليوم جاية اخطبك من اهلك ...
بحبك ..
كان بعينها دمعتين
دمعة من الفرحة
و دمعة لأنها بآخر فترة قسيت عليه
و كانت لهفتا فرحتها و دموعها بالنسبة الو
احلى من اي شي ممكن يشوفو بهالكون ..
خبرت اهلا كلشي .. اهلا قبلو ..
صح كان في احسن منو مادياً ..
بس كانو اهلا مأكدين من عيونها
من ضحكتها وفرحتها انها ما رح تكون سعيدة
مع شب غيرو اكتر من سعادتها بلحظة معو ...
يمكن كل شي كان بالدين من رفقاتو من اهلو من قرابو ..
يمكن باع كتير شغلات و اتخلا عنهم ليحقق
جزء من حلمهم ويحافظ على الحب يلي بينهم ..
بس اكيد كان وفي لحبّو و ضحى كرمالو ..
و مافي احلى من هيك تضحية
التضحية كرمال حبّك و سعادتك
نيالهم على احلى و ابسط شي
ما بيقدر يملكو اي أنسان
لا بمال ولا بأي شي
" السعادة و الحب "
______________
مـجـد عجلوني
2014/04/22